စစ်အာဏာသိမ်းမှုနှင့် မတရားအုပ်ချုပ်မှုများကြောင့် သန်းနှင့်ချီသော လူငယ်များ၏ ပညာသင်ကြားရေးအခွင့်အလမ်းများသည် ဆိုးရွားစွာ ထိခိုက်လျက်ရှိပါသည်။ အထူးသဖြင့် ပဋိပက္ခဖြစ်ပွားရာဒေသများတွင် နေထိုင်ကြသော လူငယ်များသည် တရားဝင်ပညာရေးစနစ်အတွင်း ပါဝင်နိုင်ရန်နှင့် အဆင့်မြင့်ပညာများ ဆက်လက်လေ့လာနိုင်ရန် အခက်အခဲများစွာကို ကြုံတွေ့နေရပါသည်။ ထို့အပြင် တော်လှန်ရေးတွင် ပါဝင်လှုပ်ရှားနေသော လူငယ်များသည် လုံခြုံရေးအန္တရာယ်များပြင်းထန်သော အခြေအနေများအောက်တွင်ပင် ပညာရေးကို ဆက်လက်လေ့လာနိုင်ရန် အားထုတ်ကြိုးပမ်းလျက်ရှိကြပါသည်။

​

‘တို့သစ်ပင်များ’ ဖောင်ဒေးရှင်းအနေဖြင့် ပဋိပက္ခဒေသများနှင့် လွတ်မြောက်နယ်မြေများရှိ တော်လှန်လူငယ်များအတွက် ပညာရေးအခွင့်အလမ်းများ ပိုမိုရရှိစေရန် တတ်စွမ်းသမျှ ပံ့ပိုးကူညီရန် ရည်ရွယ်ထားပါသည်။ ပညာသင်ဆုများပံ့ပိုးခြင်း၊ သင်ယူရန်အတွက် လုံခြုံစိတ်ချရသောနေရာများ ဖန်တီးပေးခြင်းတို့မှတဆင့် ကျွန်ုပ်တို့ ‘တို့သစ်ပင်များ’သည် တရားမျှတပြီး သာတူညီမျှမှုရှိသော အနာဂတ်တစ်ခုကို ပျိုးထောင်နိုင်ရန်နှင့် စစ်ဘေးကြုံတွေ့နေသည့်အချိန်များတွင်ပင် ပညာရေးကို ဆက်လက်ရှင်သန်စေရန် အတူတကွ ကြိုးပမ်းသွားမည် ဖြစ်ပါသည်။